Headlines
Live Reporting
Suala la Malezi Latajwa Kurudisha Nyuma Watoto wa Kike Kujitosa Kwenye Uongozi
Zanzibar. Mkurugenzi Mtendaji wa Chama cha Waandishi wa Habari Wanawake Tanzania, Zanzibar (TAMWA Zanzibar), Dkt. Mzuri Issa amesema bado kuna changamoto ya malezi katika jamii kuwaanda watoto wa kike ili kuja kushika nafasi za uongozi.
Dkt. Mzuri alikuwa akizungumza kwenye maadhimisho ya Siku ya Mtoto wa kike yaliyoandaliwa na wadau wakiwemo ZAFELA, JUWAUZA na PEGAO hapo jana, amesema kuwa suala hili limedhihirika hata katika ngazi za chini za uongozi kwa wanafunzi wa kike wawapo shuleni.
”Utafiti tuliofanya umebaini kuwa wasichana wengi wanaogopa kushiriki nafasi za uongozi wakiwa shuleni, hali hii itaendelea hadi watakapokuwa wakubwa,” amesema Dkt Mzuri.
Tathmini ya utafiti uliofanyika na TAMWA Zanzibar kwa kushirikiana na wadau hao unaonesha kuwa kuna muamko mdogo wa wanafunzi waliopo shuleni na vyuoni kwenye suala la kushika nafasi za uongozi.
Akizungumza juu ya suala la malezi katika familia, Hawra Shamte, Mjumbe kutoka Jumuiya ya Wanawake Wenye Ulemavu Zanzibar (JUWAUZA) ameitaka jamii kuacha kuwaandaa watoto wa kike kuwa wasaidizi wa mambo pekee kwenye jamii na badala yake wawafunze pia wajibu wa kuwa viongozi.
“Familia ziache masuala ya kuwalea watoto wa kike kama wasaidizi wa kazi za nyumbani badala yake suala la uongozi pia lionekana kweye malezi,” amesema Hawra.
Tangu mwaka 2012 Umoja wa Mataifa ulitangaza maadhimisho ya Siku ya Mtoto wa Kike Duniani kila ifikapo 11 Oktoba, lakini kwa Zanzibar wadau hawa wameiadhimisha Oktoba 17, 2024 katika ukumbi wa Zura, Marisara, Mjini Magharib. Kauli mbiu ya maadhimisho haya ni Muwezeshe Mtoto Wa Kike, Apaze Sauti Yake.
Imeandaliwa na Najjat Omar
Hatma ya Muswada wa Sheria ya Kupambana na Rushwa Wenye Kipengele Tata Kujulikana Leo
Dar es Salaam. Leo, Septemba 2, 2024, Bunge linatarajia kupitisha au kutupilia mbali marekebisho yanayopendekezwa kwenye Muswada wa Mabadiliko ya Sheria ya Kuzuia na Kupambana na Rushwa wa mwaka 2024, hususan kifungu 10(b) kinachoeleza kwamba mtu ambaye atabainika kudai au kushwawishi kutoa rushwa ya ngono basi naye atashtakiwa.
Kipengele hicho kimeenda mbali zaidi na kueleza kuwa endapo mtu huyo atakutwa na hatia basi atahukumiwa kulipa faini au kufungwa jela na pengine kukumbana na adhabu zote kwa pamoja.
Wakitoa tamko lao mbele ya waandishi wa habari Agosti 31, 2024, Mtandao wa Kupinga Rushwa ya Ngono Nchini ulieleza kwamba endapo mapendekezo hayo yatapitishwa basi sheria hiyo itakwenda kuhalalisha na kuendeleza matumizi mabaya ya mamlaka kwa njia kumhukumu muathirika wa rushwa ya ngono kama mbinu ya kumnyamazisha na kuzima moto wa mapambano dhidi ya rushwa ya ngono.
Mtandao huo ukaendelea kueleza kwamba kifungu cha 25 kilichopo kwenye Sheria ya Kuzuia na Kupambana na Rushwa ya mwaka 2007 kinajitosheleza na wala hakihitaji marekeisho yoyote kwani hakina mapungufu kwenye falsafa ya sheria kwa sababu kinamlinda muathirika wa rushwa ya ngono.
Kifungu hicho cha 25 cha Sheria ya Rushwa ya Ngono ya Mwaka 2007 kinamlinda muathirika wa rushwa ya ngono kwa kuwadhibiti maofisa wakuu wanaotumia nyazifa zao na madaraka vibaya kuomba kupokea na kuomba rushwa.
Jeshi la Polisi Mbeya Lazindua Kampeni ya “Tuwaambie Kabla Hawajaaribikiwa”
Jeshi la Polisi mkoani Mbeya limezindua kampeni kwa wanafunzi wa shule ya “Tuwaambie kabla hawajaharibikiwa” kwa lengo la kupinga ukatili wa kijinsia na unyanyasaji kwa wanafunzi wawapo masomoni.
Kampeni hiyo imezinduliwa na Kamishina Msaidizi Mwandamizi wa Jeshi la Polisi, Benjamin Kuzaga, Agosti 28, 2024 ambapo alizungumza na wanafunzi wa Shule ya Sekondari ya Mbeya Day kutorubuniwa na kutokufumbia macho vitendo vya ukatili ambavyo vinakatisha ndoto zao.
Hata hivyo amewataka wanafunzi kutoa taarifa kwa Jeshi la Polisi kitengo cha dawati la jinsia, walimu, wazazi, walezi na hata viongozi wa dini pindi wanapoona viashiria vya matukio ya ukatili.
Kampeni hii inajili baada ya matukio ya ukatili kwa wanafunzi kuongezeka, itakumbukwa kuwa Agosti 23, 2024 mwalimu mmoja wilayani Kyela alihukumiwa kifungo miaka 30 kwa kosa la kumnajisi mwanafunzi wake,13.
Masauni Akutana na Uongozi wa Jeshi la Polisi Kujadili Hali ya Amani na Usalama
Dodoma. Waziri wa Mambo ya Ndani, Mwandisi Hamad Masauni leo amekutana na viongozi wa juu wa Jeshi la Polisi Tanzania kujadili hali ya amani na usalama ikiwemo matukio ya uhalifu yanayotkea nchini na hatua zilizochukuliwa.
Kikao hiko pia kimehudhuriwa na Naibu Waziri wa Mambo ya ndani, Daniel Sillo, ambapo kwa upande wa Jeshi la Polisi ujumbe wake uliongozwa na Inspekta Jenerali wa Polisi, Camillus Wambura.
Kikao hiki kinakuja ikiwa ni siku chache tangu Jeshi la Polisi kupitia kwa msemaji wake kutoa taarifa za matukio mbalimbali ya kiuhalifu yanayohusu watu kupotea na mauaji ambayo Polisi ilieleza yalitokana na sababu mbalimbali ikiwemo masuala ya kujichukulia sheria mkononi, wivu wa mapenzi na imani za kishirikina.
Lakini pia wadau mbalimbali ikiwemo Tume ya Haki za Binadamu na Utawala Bora, Chama cha Wanasheria Tanganyika (TLS), Asasi za Kiraia na vyama vya siasa wamekuwa wakipaza sauti kufuatia kuripotiwa kwa matukio ya utekaji na mauaji ya watu wazima na watoto. Baadhi ya wadau hao ikiwemo vyama vya siasa wamewatupia lawama Jeshi la Polisi wakiwashtumu kuhusika jambo ambalo wamelikanusha.
Kikao hiko cha Waziri Masauni kilihudhuriwa na viongozi wote wa kamisheni za Polisi ikiwemo Kamishna wa Utawala na Menejimenti ya Rasilimaliwatu, Suzan Kaganda, Kamishna wa Fedha na Lojistiki, Liberatus Sabas, Kamishna wa Operesheni na Mafunzo, Awadh Juma Haji, Kamishna wa Sayansi ya Uchunguzi wa Jinai, Shabani Hiki.
Wengine ni Mkurugenzi wa Upelelezi na Makosa ya Jinai CP Ramadhani Kingai, Msemaji wa Jeshi la Polisi, ACP David Misime, Naibu Kamishna kutoka Kamisheni ya Intelijensia na Jinai, Kheriyangu Khamis Mgeni, Kamanda wa Kanda Maalumu ya Dar es Salaam, SACP Jumanne Muliro.
Wanaharakati Wapinga Pendekezo Kwamba Mtoa Rushwa ya Ngono na Yeye Ashitakiwe
Mtandao wa Wadau Wanaopinga Rushwa ya Ngono ambao una wanachama zaidi ya 300 umekipinga vikali kipengele cha 10(b) kilichopo kwenye Muswada wa Sheria ya Marekebisho ya Sheria ya Kuzuia na Kupambana na Rushwa wa mwaka 2024 kinachoeleza kwamba mtu ambaye atabainika kudai au kushwawishi kutoa rushwa ya ngono basi naye atashtakiwa.
Kipengele hicho kimeenda mbali zaidi na kueleza kuwa endapo mtu huyo atakutwa na hatia basi atahukumiwa kulipa faini au kufungwa jela na pengine kukumbana na adhabu zote kwa pamoja.
Hivyo, wadau hao wanaona kwamba kipengele hicho kitakwenda kurudisha nyuma jitihada zao za muda mrefu za kuhakikisha watu wanaoombwa rushwa ya ngono wanajitokeza hadharani, kwani watakuwa waoga kwa sababu wanaweza kushtakiwa kwa kudaiwa kuwa walidai au walishawishi kutoa rushwa ya ngono.
Wakizungumza na The Chango wadau hao wamefunguka mambo mbalimbali ambayo unaweza kuyasikiliza pamoja na mipango yao ya kwenda bungeni kutoa maoni yao ya kupinga kipengele hicho.
Ingia https://youtu.be/WmHUbjTP4W0?si=tZENDbn_E0xeJmTI
Habari Kubwa Leo Agosti 12, 2024
Serikali yakamilisha mapitio ya sera ya maendeleo ya vijana ya mwaka 2007
Serikali imekamilisha mapitio ya Sera ya Taifa ya Maendeleo ya Vijana ya mwaka 2007 ambayo imefanyiwa marekebisho mwaka 2024 ambapo zipo changamoto nyingi zilizobainishwa na vijana zinazotokana na baadhi ya maeneo kukosa miongozo.
Hivyo, kutokana na mapitio hayo imebainishwa kuwa mambo mengi yanayowahusu vijana kupitia sera hiyo mpya yatakwenda kupatiwa ufumbuzi.
Haya yamebainishwa leo Agosti 12, 2024, na Waziri wa Nchi, Ofisi ya Waziri Mkuu, Kazi, Vijana, Ajira na Wenye Ulemavu, Ridhiwan Kikwete, wakati akizindua sera hiyo iliyopitiwa kwenye kilele cha maadhimisho ya siku ya vijana duniani.
Mapitio ya sera hii imekuwa kilio kwa wadau wengi wa masuala ya vijana kwa siku nyingi. Sera hii kwa mara ya kwanza imetambua wigo mkubwa wa shughuli za vijana ikiwemo sanaa, michezo na ubunifu.
Mkutano wa vijana wa CHADEMA washindwa kufanyika. Viongozi, wanachama wakikamatwa
Mkutano wa vijana wa Chama cha Demokrasia na Maendeleo uliopangwa kufanyika leo Agosti 12, 2024, katika viwanja vya Ruanda Nzovwe huko jijini Mbeya umeshindwa kufanyika mara baada ya Jeshi la Polisi nchini kutangaza kuuzuia mkutano huo hapo jana.
Katika hatua nyingine jeshi hilo limeendelea na kamata kamata ya viongozi wa chama hicho ambao leo hii wanadaiwa kuwakamata Mwenyekiti wa taifa wa CHADEMA, Freeman Mbowe pamoja na Mwenyekiti wa Baraza la Vijana wa CHADEMA (BAVICHA), John Pambalu, ambao walikamatwa mara baada ya kusasili katika uwanja wa ndege wa kimataifa wa Songwe.
Akizungumza na waandishi wa habari leo Agosti 12, 2024, jijini Dar es Salaam, Naibu Katibu Mkuu wa CHADEMA, Benson Kigaila amesema kuwa wanachama na viongozi wa chama hicho 443 pamoja na waandishi wa habari watano wamekamatwa tangu jana na mpaka sasa hawana taarifa za ni wapi walipo viongozi wao.
Kutokana na hali hii vyama vingine vya upinzani wakiongozwa na ACT Wazalendo pamoja na mashirika mbalimbali wameibuka na kulishinikiza Jeshi la Polisi kuwaachilia huru wanachama na viongozi wanaowashikilia pamoja na kuweka mazingira sawa na rafiki ya vyama vya siasa kutekeleza majukumu yao.
Jeshi la Polisi lakanusha taarifa yake kuhusu kupigwa marufuku kwa mikutano ya hadhara
Jeshi la polisi nchini limesema halijapinga marufuku mikutano ya ndani na ya hadhara ya vyama vya siasa ilimradi mikutano hiyo inafuata matakwa ya sheria za nchi.
Taarifa hiyo imetolewa leo Agosti 12, 2024, kufuatia taarifa iliyotolewa na chama cha ACT Wazalendo ikionesha kuwa Jeshi la Polisi limezuia mkutano wa hadhara wa chama hicho uliopangwa kufanyika katika kata ya Charambe iliyopo Temeke, jijini Dar es Salaam.
Taarifa hiyo iliyotolewa na Kaimu Mkuu wa Polisi wilaya ya Mbagala, Robert John, aliyeeleza kuwa mikutano ya hadhara na ya ndani imezuiliwa hadi hapo yatakapotolewa maelekezo mengine.
Taarifa iliyokuja kutolewa na Msemaji wa Jeshi la Polisi, David Misime, ikaeleza kuwa walichopiga wamepiga marufuku mkusanyiko wa Chama cha Demokrasia na Maendeleo (CHADEMA) ambao ulipangwa kufanyika leo Agosti 12, 2024, huko jijini Mbeya.
Mikutano wa hadhara iliwahi kuzuiliwa nchini kwa kipindi cha miaka saba kuanzia mwaka 2016 hadi Januari 2023, hiyo ni baada ya kuibuliwa kwa mashinikizo kutoka kwa wadau mbalimbali hali iliyomfanya Rais Samia Suluhu Hassan kuirejesha tena.
