Lishe bora ni msingi mzuri wa afya bora na ukuaji mwema wa mtoto wako. Lishe bora na inayofaa inachangia kwa kiasi kikubwa maendeleo ya kimwili na kiakili ya mtoto. Hapa tunajadili misingi muhimu ya lishe bora kwa watoto na jinsi ya kuhakikisha wanapata virutubisho wanavyohitaji.
Kuanzia umri wa miezi sita, watoto wanaweza kuanza kupewa vyakula vya nyongeza pamoja na kunyonyeshwa, huku maziwa ya mama bado yakibaki kuwa chanzo kikubwa cha lishe.
Tafiti zinaonyesha kuwa vyakula vya nyongeza kama uji wa mchele, matunda, na mboga hupaswa kuwa sehemu ya lishe yao ili kuhakikisha wanapata virutubisho vyote muhimu.
Matunda na mboga mboga ni vyanzo muhimu sana vya vitamini na madini kwenye mwili wa mtoto. Kumpatia mtoto aina mbalimbali za matunda na mboga mboga kunahakikisha mtoto anapata virutubisho vya kutosha vitakavyosaidia kuukinga mwili wake na magonjwa.
Inashauriwa kwa kila mlo mtoto apate angalau tunda moja pamoja na mboga za majani. Unaweza kuanza na matunda laini kama ndizi na kisha kuongeza matunda mengine kadri mtoto anavyozidi kukua.
SOMA ZAIDI: Kama Mzazi, Unawezaje Kujali, Kulinda Afya Yako ya Akili?
Vyakula vyenye protini kama nyama, samaki, mayai na mbegu kama maharage ni muhimu pia kwa ujenzi wa tishu na misuli ya mtoto. Unaweza kumpa mtoto nyama laini, kama vile kuku au samaki peke yake, au kwa kuchanganya na vyakula vingine.
Mbegu kama vile karanga zinashauriwa kuandaliwa tofauti na unga wa uji wa mtoto na kuchanganywa wakati uji unapikwa, hii ni kwa sababu muda wa kupika wa mbegu na uji hutofautiana.
Nafaka na vyakula vyenye wanga kama vile mchele, viazi, mahindi na ngano ni vyanzo vizuri vya nishati na virutubisho kwa mwili.
Tafiti zinaoneshakuwa vyakula vyenye wanga ni chanzo kikubwa cha nguvu kwenye mwili, nguvu inayohitajika kwa shughuli za kila siku na ukuaji wa mwili. Pia, husaidia kutoa sukari kwenye mwili, ambayo ni muhimu kwa ubongo wa mtoto kufanya kazi vizuri.
Kuhakikisha mtoto anapata maji ya kutosha ni muhimu kwa afya yake. Maji husaidia katika mchakato mzima wa mmeng’enyo, kusafisha mwili, na kudumisha kiwango cha maji mwilini. Hakikisha mtoto anakunywa maji safi na salama.
SOMA ZAIDI: Vitu Muhimu vya Kufanya Kwa Ajili ya Mtoto Wako Akiwa Shuleni
Mzazi au mlezi, pale unapomuanzishia mtoto vyakula vya nyongeza ni vyema kuzingatia mabadiliko anayoyapata mtoto pale anapokula aina fulani ya chakula, umakini huu utakusaidia kutambua ni aina gani ya vyakula vinaweza kuleta changamoto ya mzio kwa mtoto, na kuchukua tahadhari mapema.
Pia, mzazi au mlezi unaweza kumuona daktari wa watoto ambaye atakusaidia kutambua kama mtoto wako ana aina gani ya mzio au hana.
Kwa kuzingatia misingi hii ya lishe bora, mzazi uanaweza kupata msingi imara wa afya kwa watoto wako. Kufuatilia mlo wao na kushirikiana na wataalamu wa afya itasaidia kuhakikisha watoto wako wanapata lishe bora inayokidhi mahitaji yao ya ukuaji na maendeleo.
Makala hizi za malezi huandaliwa na C-Sema, shirika lisilo la kiserikali linalojikita katika kuendeleza na kulinda haki za watoto Tanzania. Kwa maoni na ushauri, wapigie kwenye simu namba 116, ambayo ni maalumu kwa huduma za mtoto. Huduma hii haitozi malipo toka mitandao yote nchini. Vilevile, unaweza kuwapata kupitia kurasa za Facebook: Sema Tanzania, Twitter: @SemaTanzania, na kupitia barua pepe yao www.sematanzania.org.
