2024/2025 Election, News, Politics

Vigogo Sita Hawatakuwa na Mpinzani Kura za Maoni CCM Majimboni

Katibu wa Halmashauri Kuu Taifa(NEC) ya CCM, Itikadi, Uenezi na Mafunzo, Amos Makalla ametoa orodha ya majina ya wana CCM waliopita kwenye mchujo wa Kamati Kuu kwa ajili ya kwenda kupigiwa kura za maoni majimboni kwenye mchakato wa uteuzi wa wagombea ubunge na uwakilishhi wa chama hiko kwenye uchaguzi mkuu wa mwaka huu.

Mwandishi Wetu

July 29, 2025

subscribe to our newsletter!

Katika orodha iliyosomwa na Makalla kwa ngazi ya ubunge wa Jamhuri ya Muungano wa Tanzania, majimbo manne kati ya majimbo 272 ya Tanzania Bara na Zanzibar yatakuwa na mwana CCM mmoja ambaye atapigiwa kuwa za maoni katika mchakato wa uteuzi.

Waliopita peke yao katika majimbo hayo ni pamoja na Salma Kikwete ambaye ni mbunge wa sasa wa jimbo la Mchinga hatakuwa na mpinzani ndani ya CCM katika kura ya maoni jimbo hilo. Salma Kikwete ambaye ni mke wa Rais wa awamu ya nne, Jakaya Mrisho Kikwete aliingia Bungeni kwa mara ya kwanza mwaka 2017 baada ya kuteuliwa kuwa mbunge wa viti maalum na Rais wa awamu ya tano John Pombe Magufuli na mwaka 2020 alijitosa ubunge wa jimbo hilo la Mchinga.

Mwingine ni Doto Biteko mbunge wa sasa wa Bukombe ambaye pia ni Naibu Waziri Mkuu na Waziri wa Nishati. Biteko ambaye ni mbunge wa Bukombe tangu mwaka 2015 hatakuwa na mpinzani kwenye kura za maoni za CCM jimbo humo.

Mbunge wa Chalinze wa sasa Ridhiwani Kikwete ambaye pia ni Waziri wa Nchi, Ofisi ya Waziri Mkuu (Kazi, Vijana, Ajira na Wenye Ulemavu) naye hatakuwa na mpinzani katika kura za maoni katika jimbo hilo. Ridhiwani Kikwete ni mtoto wa Rais mstaafu Kikwete na amekuwa mbunge wa Chalinze kuanzia mwaka 2014 aliposhinda katika uchaguzi mdogo.

Naye Hamad Chande ambaye ni Mbunge wa Kojani visiwani Pemba na Naibu Waziri wa Fedha wa Tanzania kwa sasa, hatakuwa na mpinzani kwenye kura za maoni jimboni Kojan. Chande amekuwa mbunge wa Bunge la Jamhuri ya Muungano wa Tanzania tangu mwaka 2015.

Katika mkutano wake na waandishi wa habari leo, Makalla pia hii leo alitoa orodha ya wanachama waliopita mchujo wa uteuzi wa wajumbe wa Baraza la Wawakilishi Zanzibar ambapo majimbo mawili yana jina moja la mtia nia atakayepigiwa kura za maoni.

Wa kwanza ni Makamu wa Pili wa Rais wa Serikali ya Mapinduzi ya Zanzibar, Hemed Suleiman Abdulla ambaye hatakuwa na mpinzani katika kura za maoni za uwakilishi jimbo la Kiwani.

Mwingine ni Khalid Salum Mohamed ambaye ni mwakilishi wa jimbo la Donge tangu mwaka 2016 na amekuwa akishika nyadhifa mbalimbali za uwaziri katika Serikali ya Mapinduzi ya Zanzibar tangu awe mwakilishi.