Kigoma. Innocent Maziku, mwalimu wa umeme kutoka Chuo cha Ufundi Stadi (VETA) Kigoma, ni mbunifu ambaye ameamua kupambana na tatizo la usikivu hafifu, kwa kugeuza changamoto yake binafsi kuwa suluhisho la kijamii.
Amebuni kifaa kinachoweza kusaidia kuboresha usikivu hafifu, akilenga kuondoa changamoto ya gharama kubwa inayowakabili Watanzania wanaohitaji vifaa hivyo, hususan wale wasioweza kumudu gharama kubwa za vifaa vinavypatikana hivi sasa hospitalini.
Akielezea uzoefu wake binafsi kuhusu tatizo la usikivu hafifu, Maziku anasema kuwa tatizo la usikivu lilianza akiwa darasa la sita ambapo aliamka na kujikuta hasikii bila kuwa na changamoto yoyote ya ugonjwa.
“Nilipoamka asubuhi, nikajikuta sisikii. Wazazi walihangaika hospitali mbalimbali, ikiwemo KCMC, lakini vipimo vilionyesha ngoma za masikio ziko salama, wataalamu wa afya wakahisi huenda ni mfumo wa mishipa ya fahamu au upungufu wa vitamini B12,” anaeleza Maziku.
Changamoto hiyo haikumzuia kusonga mbele kwa kuwa aliendelea kusoma kwa msaada wa walimu na wanafunzi wenzake, na akawa bora katika masomo ya hisabati na sayansi.
Maziku anaeneleza kuwa alipata nguvu zaidi baada ya kumuona mwandishi mmoja wa habari kupitia Televisheni ya Taifa (TBC), ambaye alikuwa haoni lakini alimhoji askofu kwa kupapasa karatasi yenye nukta nundu.
“Madaktari waliniambia nijifunze namna ya kuishi na tatizo hili bila kuathiri mfumo mwingine wa maisha, nilijipa moyo kuwa ninaweza, kama yeye haoni lakini anasoma na anfanaya kazi nzuri, kwa nini mimi nishindwe ingali nina sikia kidogo na ninaona, basi nikaamua kusonga mbele kwa hiki kidogo nilichonacho,” anasema kwa msisitizo.
SOMA ZAIDI: Kutana na Kijana Aliyepania Kuleta Mapinduzi ya Kiteknolojia Tanzania
Innocent Maziku alianza safari yake ya elimu katika shule ya msingi Arusha, kisha akaendelea na sekondari ya Arusha Day na baadaye kidato cha sita katika shule ya Tosamaganga na hatimaye kujiunga na Chuo Kikuu cha St. Joseph, ambapo alihitimu Shahada ya Sayansi katika Uhandisi wa Elektroniki na Mawasiliano mwaka 2013.
Baada ya kuhitimu, alifanya kazi katika Chuo cha Don Bosco kama fundi umeme na kufundisha somo la Hisabati, na mwaka 2018 alijiunga rasmi na VETA Kigoma kama mwalimu wa umeme.
Safari ya Ubunifu
Maziku alianza safari yake ya ubunifu mwaka 2023, akichochewa na hitaji binafsi.
“Sababu iliyonipelekea kubuni kifaa hiki ni kwamba mimi mwenyewe nina tatizo la usikivu hafifu, nilijaribu kutengeneza kifaa hiki ili nijisaidie, na kwa kweli kimenisaidia, lakini sikubuni kwa ajili yangu pekee, bali kwa ajili ya Watanzania wengi wenye changamoto hii,” anasema.
Anaeleza kuwa jaribio la kwanza halikuwa rahisi kwa kuwa sakiti aliyotengeneza ilileta kelele kubwa kiasi cha kusababisha maumivu kwa mtumiaji, hata hivyo, kwa kutumia maarifa aliyonayo, aliendelea kuboresha kifaa hicho.
Anasema hatua ya pili ilihusisha kuongeza “filter na capacitor” ili kuchuja sauti kubwa na kuruhusu sauti ndogo kupita na hatimaye, kifaa hicho kikawa na uwezo wa kusaidia mawasiliano hata katika mazingira yenye kelele nyingi, mfano viwandani.
Maziku anafafanua zaidi kuwa baada ya kukamilisha ubunifu wake alitangaza kifaa hicho katika maonesho ya Sabasaba na katika wiki ya elimu iliyofanyika mkoani Tanga mwaka 2023, ambapo wadau mbalimbali wanaojishughulisha na uuzaji na usambazaji wa vifaa vya kuboresha usikivu walikichukua na kukipima ofisini kwao, na kikaoneka kuwa kizuri.
Zaidi Maziku anaeleza kuwa masuala ya ubunifu aliyapata kutoka kwa mwalimu mwenzake Edward Elias aliyefanya naye kazi katika karakana ya umeme kama mwalimu wa umeme, ambaye alimjengea uzoefu mkubwa, na kumpatia ujasiri wa kuanza kufanya ubunifu.
Maziku anafafanua kuwa kifaa hicho kinatengenezwa kwa kutumia vijenzi vidogo vya kielektroniki, ikiwemo kapasita na maikrofoni kwa ajili ya kunasa sauti, resista, transista na amplifier ya nguvu kwa ajili ya matumizi ya sauti ndogo, taa zinaozoonesha kuwa kifaa kimewaka na kina fanya kazi, sambamba na mfumo wa umeme ambao hutumia betri za simu na huchajiwa kwa chaja ya simu.
Mahitaji kwa ajili ya usambazaji
Maziku anasema mipango yao ya kukizalisha kifaa hicho kwa wingi inategemewa na mambo matatu muhimu, ambayo yanahusisha uthibitisho kisheria kutoka Serikalini akisistiza kuwa ni muhimu kifaa kupimwa ili kujiridhisha kuwa hakina madhara mengine ambayo mtu anaweza kuyapata kimya kimya.
Anasema endapo kifaa hicho kitathibitishwa na mamlaka za Serikali ikiwemo TMDA na TBS atahitaji mtaji na nguvu kazi ili kufanya uzalishaji mkubwa akitaja kuwa kutengeneza kifaa kimoja huhitaji siku 3 hadi 5, hivyo elimu inahitajika kwa wataalamu wengine ili waweze kuzalisha kwa wingi.
SOMA ZAIDI: Mazungumzo na Mchimbaji Mdogo wa Madini Kigoma, Tanzania: ‘Bado Hatujatambuliwa Ipasavyo’
Vilevile anataja hatimiliki kuwa ili kuzuia watu kutengeneza nakala ambazo zinaweza kuleta madhara na kuharibu kazi yake.
Maziku ameongeza kuwa mchakato wa upimaji umechukuwa muda mrefu kwa sababu ya ukosefu wa vifaa vya kupimia katika hospitali za mkoa, akitolea mfano Hospitali ya Rufaa Maweni.
Changamoto
Akizungumzia kuhusu umbo la kifaa hicho kwa sasa anasema kina ukubwa wa kipande cha mche wa sabuni huku hitaji lake kubwa ni kukipunguza ukubwa huo mpaka saizi ya kiberiti, japo anakabiliwa na changamoto ya kukosa kifaa cha kuyeyusha plastiki na hivyo anahitaji kushirikiana na wenye viwanda wanaotengeneza maumbo ya plastiki.
Vilevile anasema kuwa kwa sasa kifaa hicho kinaweza kuhudumia watu wenye usikivu hafifu pekee na kwamba ili kusaidia mtu ambaye hasikii kabisa, anapaswa kutengeneza aina mbili au tatu tofauti za vifaa ambavyo vitakuwa na sauti kubwa zaidi kusaidia watu wenye changamoto tofauti katika ngazi tofauti.
Wito kwa Serikali
Maziku anaomba serikali isimamie upimaji na uboreshaji wa kifaa hiki ili kiweze kuzalishwa kwa wingi na kwa ubora zaidi nakupunguza gharama kwa watumiaji ambapo kwa sasa, vifaa hivyo huuzwa hadi milioni tatu kwa vifaa vya kidijiti, na vya analogi kati ya laki saba hadi milioni moja.
“Serikali ichukue hatua ya kutufanyia vipimo na kusaidia uboreshaji ili kifaa kiwasaidie jamii yenye uhitaji,” anasema Maziku.
Aidha, anaahidi kuwa pindi kifaa kitakapothibitishwa na kwa maelekezo ya serikali atakitoa bure kwa wanafunzi na watu wanaoishi katika mazingira magumu.
Adela Madyane ni mwandishi wa habari anapatikana mkoani Kigoma. Unaweza kumpata kupitia vek3cutes@gmail.com
