Moja ya furaha kubwa utakayoipitia kama mzazi ni kuuona uso wa mtoto wako kwa mara ya kwanza. Umemsubiria miezi tisa, na sasa yupo duniani, furaha hiii huwa haielezeki.
Hisia za upendo, furaha, na hata mshangao huchanganyika moyoni. Kwa wengi, huu ndiyo mwanzo wa kujenga mahusiano ya karibu na mtoto.
Katika makala hii, tutajifunza jinsi mzazi unaweza kujenga uhusiano mzuri na mtoto wako akiwa mchanga pamoja na umuhimu wake.
Kwanza kabisa, kama mama, jitahidi umnyonyeshe mtoto wako kadri ya uwezo wako, haswa katika miezi sita ya mwanzo. Wakati wa kunyonyesha, kuna uhusiano wa karibu wa mwili na kihisia unaojengwa kati yenu kupitia joto lako la mwili na mtoto anavyoyasikia mapigo yako ya moyo.
Mbebe, mkumbatie na mbusu mtoto wako kadri unavyoweza. Hii ni kwa sababu watoto wachanga wanahitaji sana mguso wa kimwili, au physical touch kwa kimombo, kutoka wa wazazi wao.
SOMA ZAIDI: Je, ni Upi Umri Sahihi wa Kumpeleka Mtoto Shule ya Bweni?
Upendo na maelewano kupitia mguso wa kimwili ni sehemu muhimu ya maendeleo ya watoto kihisia na kimwili. Kumbuka, kadri mtoto anavyozidi kukua, muda wa wewe kufanya hivi vitu utapungua.
Kama ilivyo kwa mama wakati wa kunyonyesha, baba pia hakikisha unapata mda wa kukaa na mtoto. Mkumbatie mara kwa mara ikiwezekana ngozi kwa ngozi akiwa kifuani mwako.
Hii ni njia nzuri ya mtoto kukutambua kwa harufu na kuanza kujenga uhusiano wa karibu na wewe.
Muimbie mtoto wako siyo tu pale anapokua analia, hata akiwa ametulia au anacheza. Ni vizuri ukawa na desturi ya kumuimbia nyimbo nzuri na laini, kwanza itamburudisha na kumfanya atambue sauti yako mapema, pia, kumuimbia kunaweza kumsaidia mtoto kupata usingizi na kupumzika.
Zungumza nae. Ingawa inawezekana akawa haelewi unachosema, ila atafurahi sana akiona unazungumza naye mara kwa mara – kwa sauti yako ya kawaida na siyo ya kitoto.
SOMA ZAIDI: Mtoto Anapaswa Kuwafahamu Wazazi Wake, Ndugu na Familia Tandaa
Ukiwa unamuogesha ongea naye, ukimbadilisha nguo ongea naye, mkiwa mnacheza wote pia ongea naye.
Kama jinsi kumuimbia mtoto kunamsaidia kutambua sauti yako, maongezi ya mara kwa mara kutamsaidia kujifunza lugha na kujenga uwezo wake wa kusikia na kutambua sauti mbali mbali.
Tambua kwamba, wakati huu afya yako ya akili inaweza kuathirika na kusababisha ushindwe kuelewa hisia zako wewe mwenyewe, na hisia zako kwa mtoto wako. Hii inaweza kuathiri mahusiano yako na mtoto na hata familia kwa ujumla.
Ni vyema kuchukua muda wa kujitafakari na kujijali, ukianza na usafi wako wa mwili na mazingira yanayokuzunguka.
Pia, jitahidi kupata muda wa kupumzika. Wewe na mwenza wako mnaweza kupokezana muda wa kupumzika na kukaa na mtoto, ndugu au marafiki wa karibu wanaweza kukusaidia pia.
SOMA ZAIDI: Tuzungumze Kuhusu Umuhimu wa Michezo kwa Watoto
Ni kweli kwamba kipindi hiki cha malezi huwa chenye furaha mno lakini kina ugumu wake. Maisha yako yatazidi kubadilika na utajifunza mengi. Usikate tamaa, safari yako ya malezi imeanza na tukutakie kila la kheri!
Makala hizi za malezi huandaliwa na C-Sema, shirika lisilo la kiserikali linalojikita katika kuendeleza na kulinda haki za watoto Tanzania. Kwa maoni na ushauri, wapigie kwenye simu namba 116, ambayo ni maalumu kwa huduma za mtoto. Huduma hii haitozi malipo toka mitandao yote nchini. Vilevile, unaweza kuwapata kupitia kurasa za Facebook: Sema Tanzania, Twitter: @SemaTanzania, na kupitia barua pepe yao www.sematanzania.org.
