Familia ya Enock John Chambala (41) imeendelea kujawa na hofu juu ya hatma ya ndugu yao aliyetoweka katika mazingira ya kutatanisha toka Julai 06,2024.
Chambala ni mfanyabiashara wa zao la Mkonge mwenye makazi yake mkoani Tanga, katika mtaa wa Kange.Toka Julai 06,2024, familia ilianza kuingiwa na wasiwasi baada ya Chambala kutopatikana katika simu yake.
Mdogo wake Chambala, Baraka John Chambala aliamua kuchukua jukumu la kufika nyumbani kwa Chambala ikiwemo kuuliza kwa ndugu na marafiki ikiwa wanafahamu alipo mfanyabiashara huyo.
Mazingira yaliyokutwa nyumbani kwake kwa mujibu wa mdogo wake ni kama mtu aliyeondoshwa bila hiari yake huku akiacha chakula na jiko likiwa linapasha chakula taratibu. Mdogo wake anaeleza pia kuwa walikuta mlango wa nyumba yake ukiwa haujafungwa, jambo ambalo sio kawaida kwa Chambala.
Kutokana na mazingira kuonekana yamejaa utata, familia iliamua kufungua shauri katika kituo cha Polisi Tanga na kupewa RB no. TAN|RB|3040|2024, hata hivyo hakuna dalili zozote za kuonesha ndugu yao yupo wapi na kama yu mzima au la.
Hivi karibuni kumekuwa na matukio mengi ya watu kupotea, huku wengine wakitekwa. Jeshi la Polisi na Serikali limeeleza kuwa sio matukio yote ni ya utekaji, na pia kukanusha taarifa zilizokuwa zikihusisha vyombo vya usalama na matukio ya utekaji wa Watanzania.
