Mwandishi aliwasilisha wasilisho hili kwa mara ya kwanza Zanzibar, Disemba 15, 2024, wakati wa Mkutano wa Nne wa Kukumbuka na Kuenzi Urithi wa Maalim Seif Sharif Hamad. The Chanzo inalichapisha hapa kwa ruhusa ya mwandishi. Uhariri umefanyika kuimarisha usomaji.

Kwa  niaba  ya  wenzangu  18  ambao  hisia  zetu  zimekusanyika  kwa  njia  ya maandishi   kwa tungo  ambazo  zimekusanywa  ndani  ya  diwani  ya  Ahadi Iliyotimizwa, tunatanguliza shukran kwa Muumba kwa kuuzawadia ulimwengu, Tanzania na visiwa vya Zanzibar mja wake ashrafu Maalim Seif Sharif Hamad. 

Kwa  namna alivyoishi,  ni wazi  kuwa alifanikiwa  kuzichota  nyoyo za wengi na akazifanya  zimee  kwa  mapenzi  yake  kwao  hata  naye  kuyapata  mapenzi ya nyoyo hizo kwake. Ama, pengine shwari na amani ambayo tunaifurahikia sasa katika ardhi hii, ni pamoja na mchango wake mkubwa na mapenzi yake makuu kwa nchi yake na watu wake. 

Ni kwa mapenzi hayo, hakutamani kabisa kuona kiza   cha   kukosekana  amani kinatugubika   licha  ya  tafauti  za  kisiasa  na kutokukubaliana katika baadhi ya mambo.

Hakuna asiyefahamu kuwa ushairi wa Kiswahili umebeba hisia, na bila shaka ni hisia  za  majonzi  ndizo  zilizoweza  kuwasukuma  wengi  kuandika  mashairi  ya kumuadhimisha na kumlilia mzee wetu, Maalim Seif Sharif Hamad. 

Sisi watunzi 19  ni wachache  katika wengi waliohuzunika, ila tunapenda kumpongeza kaka yetu, Mohammed Khelef Ghassani, kwa juhudi zake kuhakikisha kuwa machache katika mengi ya mashairi yaliyoandikwa anayakusanya na kuyafanya diwani ya pamoja  kama  alama  ya  kuzikusanya  hisia  zile,  kuzipa  uhai  na  kutufanya tuendelee kulia na kujiliwaza kwa msiba uliotufika miaka mitatu iliyopita.

SOMA ZAIDI: Tumejifunza Nini Kutoka Mkutano wa Pili wa Urathi wa Maalim Seif?

Nikiizungumzia  nafsi  yangu,  nikiwa  mmoja  wa  watunzi  wa  diwani  hii,  nakiri kutokuwa na asili ya Zanzibar, lakini namshukuru Mungu nimeishi ndani Zanzibar kwa miaka isiyopungua mitano mtawalia, na mbali na hapo niliguswa na mengi mazuri ambayo nilipata kuyasikia kupitia masimulizi rasmi na yasiyo rasmi.

Lakini pia nimejaaliwa kuona namna ambavyo hisia za watu, hasa Wazanzibari, ambao ndio wana mafungamano ya moja kwa moja na Maalim. Nilikiri, na ninakiri, kuwa kuna mapenzi, mapenzi ya dhati, mapenzi makuu, mapenzi makali mno ya watu kuwa tayari kuongozwa naye na hata kufanya lolote atalowaamrisha, iwe kwao linaingia akilini au vinginevyo.

Na ithbati ya hili, imepita misiba kadhaa kabla ya kuuka kwa Maalim na baada yake, misiba ya viongozi waliowahi kushika ngazi za juu kabisa katika nchi zetu, wanasiasa  nguli, watu  maarufu, watu wenye vyao walivyomiliki, lakini hakuna msiba ambao ulikita kwenye nyoyo za wanaMalenga Chipukizi na kudhihirisha hisia zao kama ilivyokuwa kwa kuuka Maalim Seif Sharif Hamad.

Tungo  za  kumuomboleza,  tungo  za  kuyanadi  mazuri  yake,  tungo  za  kunadi nafasi  yake  kwenye  nyoyo  zao,  zilikuwa  zikimiminika  kwa  namna  macho yalivyokuwa yakibubujikwa machozi, michirizi michirizi.

Kubwa  kabisa  ambalo  anatuachia  sisi  vijana,  taifa  la  leo  na  baadae,  ni kutothubutu  kuacha  kuzipenda  nchi zetu za  uzawa,  kwa  hali zote hata kama itakuwa tumedhulumiwa mali na roho zetu. 

SOMA ZAIDI: Maajabu ya Maalim Seif Akiwa Hai Yanaendelea Mpaka Akiwa Kaburini? 

Kuwa na msimamo thabiti kwa hoja katika  tunayoyaamini,  lakini  bila  kuwa  na  kibri, jeuri  na  ujivuni.  Uzalendo wa kweli, uungwana, busara na hekima vitawale katika kila ambalo ni mbegu bora ya  kuifanya ardhi yetu  hii  imee,  ikuwe,  iendelee  na  kuwa  mfano  mwema wa kuigwa na mataifa mengine.

Mwisho, tunaamini kuwa Maalim Seif Sharif Hamad atasimama kama maktaba ya kusoma kwa viongozi wetu kwa ngazi zote, na kwa hakika ametufunza kuwa uongozi unaoacha alama chanya ni ule wa kutawala nyoyo za waongozwao na si viwiliwili vyao.

Mja mwema alikuwa, alojisahau yeye, siko alikozalika

Ametufunza muruwa, uzalendo utungiye, hata bila mamlaka 

Moliwa kamchukuwa, ila hakika tunaye, wanati wa kila rika

Ingawa amefukiwa, haifukiwi gheraye, kwa miaka na mikaka

Ardhi hii kupowa, ili kuu shaukuye, nalo limetimilika

Jukumu tulilopawa, ni kulinda misingiye, bila chembe kumpoka

Na tumuombee duwa, pahala pema akaye, ambapo alipataka

Umfunike uluwa, tabu zisimfikiye, azidi stareheka

Siku ya kufufuliwa, kando yake awe naye, mtume wetu Mmaka

“Allaahumma ghfirlahu warhamhu waskanahu fil Jannah”

Aamiin!

Bashiru Abdallah ni moja kati ya washairi 19 walioshirikiana kuandika kitabu cha mashairi chenye kuenzi maisha ya Maalim Seif Sharif Hamad, mwanasiasa aliyetoa mchango mkubwa kwenye harakati za kupigania mageuzi ya kisiasa na kiuchumi Tanzania. Kitaby hicho kinachoitwa Ahadi Iliyotimizwa, kilizinduliwa rasmi Disemba 15, 2024, wakati wa Mkutano wa Nne wa Kukumbuka na Kuenzi Urithi wa Maalim Seif Sharif Hamad, uliofanyika katika Hoteli ya Verde, mjini Zanzibar.